MFUKO wa SELF (SELF Microfinance Fund) umetoa mikopo yenye thamani ya Shilingi bilioni 138.28

 

Afisa Mtendaji MKuu wa Self ZMicrofinance Fund, Santiel manongi — torintohot media 0789106710

Na. Jerome Mlaki wa Dar.

Afisa Mtendaji Mkuu wa Mfuko wa Taifa wa Huduma Ndogo za Kifedha (SELF Microfinance Fund), Santieli Yona, alifanya kikao kazi na wahariri na waandishi wa habari jijini Dar es Salaam mnamo Oktoba 28, 2026, kikiwa kimeratibiwa na Ofisi ya Msajili wa Hazina.

Akizungumza na wahariri na waandishi wa habari jijini Dar es Salaam Afisa Mtendaji Mkuu wa Mfuko wa Taifa wa Huduma Ndogo za Kifedha (SELF Microfinance Fund), Santieli Yona, amesema  Mfuko wa SELF umetoa mikopo ya bilioni 138.28, Wanawake waongozi.

MFUKO wa SELF (SELF Microfinance Fund) umetoa mikopo yenye thamani ya Shilingi bilioni 138.28 katika kipindi cha miaka mitatu kuanzia mwaka 2023 hadi 2025, ikiwawezesha wananchi katika mikoa mbalimbali ya Tanzania Bara na Zanzibar kuendesha na kukuza shughuli zao za kiuchumi.

Afisa Mtendaji Mkuu wa Mfuko wa SELF, Bi. Santieli Yona ameyasema hayo leo Oktoba 28, 2026 jijini Dar es Salaam katika kikao kazi kati ya mfuko huo, wahariri na waandishi wa habari kilichoandaliwa na Ofisi ya Msajili wa Hazina (OTR).

Pia, amesema jumla ya watu 131,312 wamenufaika na mikopo hiyo, ambapo wanawake walikuwa 66,969 sawa na asilimia 51 ya wanufaika wote huku vijana wakiwa 19,696.

Aidha, mikopo hiyo imechangia kuzalishwa kwa ajira 262,624, hatua inayodhihirisha mchango wa mfuko huo katika kukuza ujasiriamali, kupanua fursa za kujiajiri na kuongeza kipato cha wananchi.

Bi. Yona amesema, dhamira ya mfuko huo ni kuhakikisha huduma za kifedha zinawafikia wananchi wengi zaidi hususan wajasiriamali wadogo, wakulima, wafugaji, vijana na makundi mengine yanayohitaji mitaji kwa ajili ya kuanzisha au kupanua shughuli zao za kiuchumi.

Ameeleza kuwa, mfuko huo hutumia mifumo miwili ya utoaji mikopo ikiwemo kuwafikia wananchi moja kwa moja na kushirikiana na taasisi nyingine za kifedha zinazowafikishia huduma wanufaika katika maeneo mbalimbali nchini.

Kupitia mfumo wa ushirikiano, amesema Mfuko wa SELF hutoa mikopo kwa taasisi ndogo za fedha, vyama vya kuweka na kukopa (SACCOS) na vyama vya ushirika wa mazao (AMCOS) vinavyosaidia kusogeza huduma za kifedha karibu na wananchi.

Mfumo wa utoaji mikopo wa moja kwa moja amesema, unalenga makundi mbalimbali, yakiwemo wajasiriamali wadogo, wakulima, wafugaji na watumishi wa umma.

ELIMU YA FEDHA NA BIMA

Mbali na kutoa mikopo, Bi. Yona amesema, mfuko huo una jukumu la kutoa elimu ya fedha kwa wateja wake ili kuwawezesha kufanya maamuzi sahihi kuhusu mikopo, kupanga matumizi ya fedha na kusimamia marejesho kwa kuzingatia uwezo wao wa kiuchumi.

SELF Microfinance Fund

Read More

Makamu wa Rais wa Jamhuri ya Muungano wa Tanzania, Mhe. Deogratius John Ndejembi, ameiagiza Wizara ya Nishati kupitia Mamlaka ya Udhibiti wa Mkondo wa Juu wa Petroli (PURA)

 Na. Jerome Mlaki wa Dar. 0789106710

DAR ES SALAAM - Makamu wa Rais wa Jamhuri ya Muungano wa Tanzania, Mhe. Deogratius John Ndejembi, ameiagiza Wizara ya Nishati kupitia Mamlaka ya Udhibiti wa Mkondo wa Juu wa Petroli (PURA) kuandaa mpango mkakati utakaowawezesha vijana na kampuni za Kitanzania kunufaika na fursa za ajira, zabuni na uwekezaji katika miradi ya mafuta na gesi asilia nchini.

Makamu wa Rais ametoa maagizo hayo leo, Oktoba 28, 2026, wakati wa hafla ya utiaji saini wa leseni nne za utafutaji wa mafuta na gesi asilia katika vitalu vya Mnazi Bay North, West Songo Songo, Eyasi - Wembere na Lindi- Mtwara, iliyofanyika katika Kituo cha Kimataifa cha Mikutano cha Julius Nyerere (JNICC), Dar es Salaam.

Makamu wa Rais amesema ni muhimu kuhakikisha Watanzania, hususan vijana na wanawake, wanapewa kipaumbele katika ajira, mafunzo, teknolojia na zabuni, huku kampuni za ndani zikiwezeshwa kushiriki kikamilifu katika mnyororo wa thamani wa sekta hiyo.

Aidha, ameitaka Wizara ya Nishati kuimarisha mifumo ya tathmini, ufuatiliaji na usimamizi wa leseni hizo, sambamba na kuhakikisha kunakuwa na nidhamu ya matumizi ya fedha, uwajibikaji na ongezeko la mapato ya Serikali kupitia kodi, mrabaha na mgao wa faida.

Ameielekeza TPDC kushirikiana na wawekezaji wenye uwezo wa kifedha, ujuzi na teknolojia ili kuongeza tija katika shughuli za utafutaji na uendelezaji wa mafuta na gesi asilia, huku akiwataka wadau kutanguliza uzalendo kwa Tafa, uadilifu, uchapa kazi na maslahi ya Taifa mbele.

Makamu wa Rais amesema Serikali itaendelea kuweka mazingira wezeshi ya uwekezaji, yanayozingatia uwazi, kutabirika kwa mifumo ya kisheria, ushindani wa haki na ulinzi wa maslahi ya Taifa.

Makamu wa Rais amesema, pamoja na lengo la kukuza pato la Taifa kufikia dola za Marekani trillioni 1 kama iliyoainishwa kwenye dira ya Taifa ya 2050. Matarajio mengine ya leseni hizo katika ugunduzi wa mafuta na gesi asilia ni ongezeko la mapato ya Serikali kupitia mrabaha, kodi na mgao wa faida.

Amesema uzalishaji wa umeme kwa kutumia gesi unatarajiwa kuchangia uzalishaji wa Megawati 70,000 (zitakazohitajika ifikapo 2050), na kukuza ujuzi, teknolojia, kuongeza ajira na kupanua fursa kwa kampuni za Tanzania zinazotoa huduma katika sekta hiyo.

Ametaka uwepo wa usimamizi madhubuti, nidhamu ya matumizi ya fedha na uwajibikaji. Ametoa rai kwa taasisi zote zinazohusika na uwekezaji huu kuhakikisha Watanzania, hususan wanawake na vijana wanapewa fursa za ajira, mafunzo, teknolojia na zabuni. Vilevile, ni muhimu kuimarisha ushiriki wa kampuni za Kitanzania katika mnyororo wa thamani wa mafuta na gesi.

Makamu wa Rais amesema lengo la Serikali ya Awamu ya Sita ni kuanzisha Kituo cha umahiri cha kuendeleza ujuzi unaohitajika katika sekta ya mafuta na gesi asilia ili kujenga rasilimali-watu yenye ujuzi na itakayowezesha kuleta ustawi wa Uchumi jumuishi na endelevu.

Awali, Waziri wa Nishati, Dkt. Juma Zuberi Homera, amemshukuru Rais Dkt. Samia Suluhu Hassan kwa kuendeleza uwekezaji katika miradi ya kimkakati ya nishati, akisema hatua ya TPDC kukabidhiwa leseni na kumiliki vitalu vyake ni mafanikio makubwa katika kuimarisha uwezo wa Taifa wa kutafuta na kuendeleza rasilimali za mafuta na gesi.

Amesema dhamira ya Serikali ni kuhakikisha gesi asilia inayoendelezwa inatumika katika shughuli mbalimbali, zikiwemo matumizi ya majumbani, usafiri, uzalishaji wa umeme na viwandani, huku wananchi na kampuni za ndani zikinufaika na uwekezaji huo.

Kwa upande wake, Mkurugenzi Mtendaji wa TPDC, Mhandisi Mussa Makame, amesema vitalu vinne vilivyohusika katika utiaji saini viko katika hatua mbalimbali za utekelezaji, ikiwemo ukusanyaji wa taarifa za mitetemo kwa ajili ya shughuli za utafutaji wa mafuta na gesi asilia

asilia inayoendelezwa inatumika katika shughuli mbalimbali, zikiwemo matumizi ya majumbani, usafiri, uzalishaji wa umeme na viwandani, huku wananchi na kampuni za ndani zikinufaika na uwekezaji huo.

Kwa upande wake, Mkurugenzi Mtendaji wa TPDC, Mhandisi Mussa Makame, amesema vitalu vinne vilivyohusika katika utiaji saini viko katika hatua mbalimbali za utekelezaji, ikiwemo ukusanyaji wa taarifa za mitetemo kwa ajili ya shughuli za utafutaji wa mafuta na gesi asilia.

Amesema shirika hilo litahakikisha wananchi wanashirikishwa kikamilifu, kampuni za ndani zinapewa kipaumbele kulingana na uwezo na utaalamu wao, pamoja na kutekeleza miradi ya uwajibikaji kwa jamii (CSR) ili uwekezaji huo uwe na manufaa ya moja kwa moja kwa wananchi.

Read More

Read More

BODI ya Utalii Tanzania (TTB) imezindua kampeni ya CODE +255 – TWENZETU KUTALII.

 Na.  Jerome Mlaki wa Dar 0789106710

Mkurugenzi Mkuu wa TTB, Dkt. Thereza Mugobi

BODI ya Utalii Tanzania (TTB) imezindua kampeni ya CODE +255 – TWENZETU KUTALII, inayolenga kuwahamasisha Watanzania kutembelea na kujionea vivutio mbalimbali vya utalii nchini kuelekea sikukuu za mwisho wa mwaka.

Kampeni hiyo imeanza kutekelezwa  leo Oktoba 27, 2026 hadi Januari 15, 2027, itashirikisha watu maarufu, washawishi wa mitandao ya kijamii na Chama cha Wamiliki wa Mabasi Tanzania (TABOA) kutangaza vivutio hivyo na kuhamasisha utalii wa ndani.

Mkurugenzi Mkuu wa TTB, Dkt. Thereza Mugobi akionyesha tishet katika uzinduzi huo.

Akizungumza na waandishi wa habari, Mkurugenzi Mkuu wa TTB, Dkt. Thereza Mugobi, amesema zaidi ya mabasi 400 yanatarajiwa kuwekwa maudhui ya utalii ili kuwafikia abiria wengi na kuwafahamisha vivutio vinavyopatikana katika maeneo mbalimbali nchini.

Amesema kampeni hiyo pia itahusisha ofa na vifurushi maalumu vya safari kwa gharama nafuu, ili kuwawezesha Watanzania wa makundi mbalimbali kushiriki utalii kulingana na uwezo wao.

“Kampeni yetu hauishii kwenye hifadhi za wanyamapori pekee, bali unahusisha pia fukwe, maeneo ya kihistoria, utamaduni, vyakula vya asili, sanaa na matamasha, ambavyo vinaweza kuongeza kipato kwa wajasiriamali na watoa huduma mbalimbali,”

Makamu Mwenyekiti wa TABOA, Mbazi Mbazi, amesema chama hicho kinaunga mkono kampeni hiyo na kitaweka utaratibu wa kuhakikisha mabasi yanatumika kutangaza vivutio vya utalii kupitia filamu na chaneli zinazoonyeshwa kwa abiria.

“Tumejiandaa magari yetu yatatumika kusafirisha abiria kwenda maeneo mbalimbali yenye vivutio vya utalii, huku wananchi wakiangalia filamu. Tunafanya hivyo kwa sababu jambo hili ni la kizalendo na tupo tayari kuitangaza nchi yetu,” amesema Mbazi.

Mtengengeza Maudhui mtandaoni Fadhil Atick, maarufu  Mr Pengo, amesema ataandaa maudhui yatakayohamasisha Watanzania kutembelea vivutio vya utalii, huku mwigizaji Leah Mwendamseke, maarufu Lamata, akisema atatumia ushawishi alionao kutangaza utalii na kuwa mfano kwa kutembelea maeneo mbalimbali.

Kwa upande wake, Maxwell Alfred , maarufu Mzee Shayo, amesema Watanzania wanapaswa kutumia fursa ya utalii wa ndani kwa kuwa gharama za kutembelea baadhi ya vivutio ni nafuu ikilinganishwa na viwango vinavyotozwa watalii wa wageni.

Akitolea mfano, amesema kiingilio cha Sh5,900 kwa Mtanzania ni nafuu ikilinganishwa na dola 30 za Marekani, sawa na takribani Sh79,000, kwa mgeni.

Naye Muigizaji, Leah Mwendamseke ( Lamata) amesema  kupitia ushawishi walionao wataendelea kutangaza  utalii pamoja na wao kuwa mfano kwa kutembelea maeneo mbalimbali.

Read More

Shirika la Viwango Tanzania (TBS) limeandaa viwango 3,901 vya bidhaa katika sekta mbalimbali na kutoa vyeti na leseni za ubora 3,940 kwa wazalishaji

  

Na Jerome Mlaki wa Dar 0789106710

Shirika la Viwango Tanzania (TBS) limeandaa viwango 3,901 vya bidhaa katika sekta mbalimbali na kutoa vyeti na leseni za ubora 3,940 kwa wazalishaji, wakiwemo wajasiriamali wadogo 1,683, katika kipindi cha Serikali ya Awamu ya Sita kuanzia mwaka 2021 hadi 2026.

Hayo yamesemwa na Mkurugenzi Mkuu wa TBS, Dkt. Ashura Katunzi, wakati akizungumza kwenye kikao kazi kilichoandaliwa na Ofisi ya Msajili wa Hazina kwa waandishi wa habari na wahariri wa vyombo mbalimbali vya habari, Oktoba 27, 2026, jijini Dar es Salaam.

Amesema hatua hiyo inalenga kuimarisha ubora na usalama wa bidhaa zinazozalishwa nchini, kuwawezesha wazalishaji kushindana katika masoko ya ndani na nje ya nchi na kuchochea ukuaji wa uchumi wa Taifa.

Amesema TBS, iliyoanzishwa kwa lengo la kuimarisha sekta za viwanda na biashara, hutekeleza majukumu yake kwa kuzingatia Sheria ya Viwango, Sura ya 130.“Katika kipindi hicho, shirika limeendelea kuboresha miundombinu ya utoaji huduma, kuimarisha ukaguzi wa bidhaa, kusajili bidhaa na maeneo ya biashara pamoja na kutoa elimu kwa wazalishaji na wadau wengine kuhusu masuala ya viwango na ubora,” amesema.

Amesema katika kuboresha upatikanaji wa huduma, TBS inaendelea na hatua za mwisho za ukamilishaji na makabidhiano ya mradi wa ujenzi wa ofisi na maabara katika eneo la Njedengwa, jijini Dodoma, unaojulikana kama Viwango House–Dodoma, wenye thamani ya Sh bilioni 24.7.

Pia, shirika linaendelea na ujenzi wa ofisi na maabara katika eneo la Kiseke, Wilaya ya Ilemela, jijini Mwanza, kupitia mradi wa Viwango House–Mwanza, unaokadiriwa kugharimu Sh bilioni 12.1.Aidha, TBS ipo katika hatua za awali za maandalizi ya ujenzi wa ofisi na maabara nyingine jijini Arusha, zitakazojulikana kama Viwango House–Arusha.

“Maabara za Dodoma zinatarajiwa kuhudumia mikoa ya Dodoma, Singida na Tabora, wakati maabara za Mwanza zitahudumia mikoa sita ambayo ni Mwanza, Kagera, Mara, Geita, Shinyanga na Simiyu.

“Uwekezaji huo unalenga kusogeza huduma karibu na wananchi na kupunguza gharama za upimaji, huku ukiongeza ufanisi katika upatikanaji wa majibu ya vipimo vya sampuli,” amesema.Mkurugenzi huyo amesema katika hatua nyingine, Serikali kupitia TBS imetumia zaidi ya Sh bilioni 9.8 kuimarisha ofisi tisa za kanda pamoja na ofisi za mipakani, bandarini na viwanja vya ndege.

Ofisi hizo zinahusisha kanda za Arusha, Mwanza, Mtwara, Dar es Salaam, Dodoma, Kigoma, Mbeya, Pwani na Geita, pamoja na maeneo mbalimbali ya kuingilia bidhaa nchini.Amesema uboreshaji huo umehusisha kuongeza ofisi, wafanyakazi na vitendea kazi kwa lengo la kuboresha utoaji wa huduma na kuimarisha ukaguzi wa bidhaa sokoni na mipakani ili kupunguza uwepo wa bidhaa hafifu na kulinda afya na usalama wa walaji.

Read More

TAARIFA KUHUSU MAFANIKIO YA SHIRIKA LA VIWANGO TANZANIA (TBS) .

SHIRIKA LA VIWANGO TANZANIA (TBS)       TAARIFA KUHUSU MAFANIKIO YA SHIRIKA LA VIWANGO TANZANIA (TBS) KATIKA KIPINDI CHA SERIKALI YA AWAMU YA SITA KUELEKEA UTEKELEZAJI WA DIRA 2050 KWA WAHARIRI NA WAANDISHI WA VYOMBO VYA HABARI        

  OKTOBA 27 2026, DAR ES SALAAM

Menejimenti ya TBS ;Wafanyakazi kutoka ofisi ya Msajili wa Hazina na TBS ;Wahariri wa Vyombo vya Habari ;Waandishi wa Habari ;Nawasalimu kwa Jina la Jamhuri ya Muungano wa Tanzania.

Awali ya yote naomba nimshukuru Mwenyezi Mungu kwa kutujaalia afya na uzima na kutuwezesha kuwepo hapa siku ya leo. Pili niwashukuru ofisi ya Msajili wa Hazina kwa kuona umuhimu wa kuandaa mkutano huu ili kuweza kuwasilisha mafanikio yetu katika kipindi cha uongozi wa awamu ya sita. 

Tatu niwashukuru wahariri wote na waandishi wa Habari kwa kuitikia wito kwani nyie ni watu muhimu katika kutuunganisha na jamii kupitia vyombo vya Habari.Ndugu Wanahabari,

Shirika la Viwango Tanzania (TBS) lilianzishwa kama sehemu ya jitihada za Serikali katika kuimarisha mustakabali wa sekta za Viwanda na Biashara ili kukuza uchumi wa Taifa na linatekeleza majukumu yake kwa kuzingatia Sheria ya Viwango Sura namba 130. Kipindi cha Serikali ya awamu ya Sita (2021-2026), kimekuwa cha mafanikio makubwa kwa Shirika la Viwango Tanzania (TBS) katika utekelezaji wa majukumu yake.

 Mafanikio hayo yanaendana na kutimiza azma ya Shirika katika masuala mbalimbali kama ifuatavyo :Kwanza, ni Kusogeza Huduma Karibu na Wateja; Katika kuhakikisha wananchi wanapata huduma kwa ukaribu na kupunguza gharama, Serikali kupitia Shirika la Viwango Tanzania linaendelea na hatua za mwisho za ukamilishaji na makabidhiano ya mradi wa ujenzi wa maabara na ofisi katika eneo la Njedengwa, jijini Dodoma, au kwa jina jingine mradi wa Viwango House – Dodoma  wenye thamani ya TZS 24.7 Bilioni. 

Vilevile Shirika linaendelea na utekelezaji wa mradi wa ujenzi wa ofisi na maabara katika Kanda ya Ziwa eneo la Kiseke Wilaya ya Ilemela – Mwanza, mradi unaojulikana kama Viwango House- Mwanza. Mradi huo unakadiriwa kugharimu TZS 12.1 Bilioni  

vilevile Shirika  lipo katika hatua za awali za maandalizi za  mradi wa ujenzi wa ofisi na maabara Jijini Arusha ( Viwango House -Arusha).Kwa upande wa Dodoma, maabara zilizojengwa zinahudumia pia mikoa ya karibu na Dodoma hususani Singida na Tabora.

 Aidha, maabara za Mwanza zinatarajiwa kuhudumia mikoa sita, ambayo ni Mwanza, Kagera, Mara, Geita, Shinyanga na Simiyu. Hatua hiyo ya ujenzi wa ofisi na maabara itasaidia kusogeza huduma karibu na wananchi na kuongeza ufanisi katika utoaji wa majibu ya vipimo vya sampuli.

Ndugu Wanahabari,Serikali kupitia TBS imetumia zaidi ya TZS 9.8 bilioni kwa ajili ya kuimarisha ofisi tisa za kanda (Arusha, Mwanza, Mtwara, Dar es Salaam, Dodoma, Kigoma, Mbeya, Pwani na Geita) pamoja na ofisi za mipakani (Tunduma, Kasumulo, Horohoro, Holili, Tarakea, Namanga, Bandari ya Mwanza, Uwanja wa Ndege wa Mwanza, Uwanja wa Ndege wa Kimataifa wa Kilimanjaro, Sirari, Kabanga, Rusumo, Mutukula, Kasesya, Bandari ya Bagamoyo, bandari ya Mbweni, bandari ya Dar es Salaam, Uwanja wa Ndege wa Kimataifa wa Julius Kambarage Nyerere na Bandari ya Tanga) kwa kuongeza ofisi mpya za kanda, wafanyakazi na vitendea kazi kwa ajili ya kutoa huduma kwa wakati na kuimarisha zoezi la ukaguzi wa mara kwa mara katika soko ili kupunguza bidhaa hafifu sokoni na hatimaye kuhakikisha wananchi wanapata bidhaa bora na salama.

Ndugu Wanahabari,Pili, Kuwezesha Biashara;  Ili kuwezesha Biashara, Shirika lina Kamati za Kitaalam (Technical Commitees) za Uandaaji Viwango 117 katika sekta ya chakula, kemikali, uhandisi mitambo, uhandisi umeme, uhandisi ujenzi, nguo na ngozi, madini na mitambo ya uchimbaji madini, mazingira na taaluma mtambuka (general tecniques).  

Katika mchakato wa kuandaa viwango Kamati hizo zinashirikisha wadau mbalimbali ikiwemo vyuo vikuu, taasisi za utafiti, wafanyabiashara, wazalishaji, vyama vya walaji, vyama na bodi za wataalam, taasisi za udhibiti na watunga sera. 

Katika kipindi cha Serikali ya awamu ya sita Shirika limefanikiwa kuandaa viwango 3901 vya sekta mbalimbali kwa kuzingatia mahitaji ya soko ambavyo vinasaidia wafanyabiashara, wajasiriamali na watoa huduma kuzalisha bidhaa bora zenye kukidhi matakwa ya viwango, hivyo kuwawezesha kufanya biashara ndani na nje ya nchi, hatua ambayo italeta tija na kuchochea ukuaji wa uchumi. Aidha, jumla ya vyeti na leseni za ubora 3,940 vimetolewa kwa wazalishaji, miongoni mwao wakiwemo wajasiriamali wadogo 1,683. 

Serikali kupitia TBS imekuwa ikitenga zaidi ya TZS milioni 300 kila mwaka kwa madhumuni ya kuhudumia wajasiriamali wadogo bila ya malipo yoyote. Leseni hizi zimesaidia wazalishaji kuweza kuzalisha bidhaa bora, ikiwa ni pamoja na bidhaa zao kuweza kuaminika sokoni na pia kufanya biashara nje ya mipaka ya Tanzania, hivyo kuchochea kasi ya ukuaji wa uchumi wa Taifa.

Shirika limeendelea na huduma za usajili wa bidhaa za chakula na vipodozi pamoja na maeneo ya uzalishaji, uuzaji, usambazaji na uhifadhi wa chakula na vipodozi kwa lengo la kuhakiki ubora na usalama wa maeneo hayo ili kuendelea kulinda afya za walaji ambapo jumla ya bidhaa 9,731 zilisajiliwa na maeneo 80,836 yalisajiliwa. 

Pia, katika kuimarisha ukaguzi wa bidhaa mbalimbali zinazoingia nchini kutoka nchi za nje, TBS huhakiki ubora wa bidhaa na magari yaliyotumika kabla ya kusafirishwa kuja nchini ambapo katika kipindi cha serikali ya awamu ya sita jumla ya shehena za bidhaa 183,186 zilikaguliwa kabla ya kuingia nchini kupitia mfumo wa Pre-Shipment to Conformity (PVoC) na shehena za bidhaa 426,842 zilikaguliwa baada ya kufika nchini kupitia mfumo wa Destination Inspection (DI). 

Aidha, jumla ya magari 249,386 yalikaguliwa. Bidhaa hizi zinakaguliwa kwa lengo la kuiepusha Tanzania kuwa jalala la bidhaa duni pamoja na kulinda afya, usalama na mazingira ya watumiaji.Kwa upande wa mafunzo, TBS imeweza kutoa mafunzo kwa jumla ya wadau 6824 wakiwemo wazalishaji wa bidhaa za viwandani na wasindikaji. 

Mafunzo hayo yalihusu dhana nzima ya viwango na ubora ambayo yatawawezesha kuzalisha bidhaa zinazokidhi matakwa ya viwango na yamewawezesha kupata uelewa mpana kwenye masuala ya udhibiti ubora, hivyo kuwaandaa kuhimili ushindani wa masoko ya ndani, kikanda na kimataifa. 

Vilevile, TBS imeendelea kutoa elimu kwa umma kupitia njia mbalimbali ili kukuza uelewa juu ya masuala ya viwango na udhibiti ubora. Njia hizo ni pamoja na kuanzisha kliniki ya Viwango ambayo inaendelea katika maeneo mbalimbali; pamoja na kushiriki katika makongamano, maonesho, warsha na semina; kuandaa mikutano na wadau wa masuala ya viwango, kutoa mafunzo mbalimbali kuhusu masuala ya ubora na usalama; na kuendesha kampeni za elimu kwa umma katika ngazi za wilaya.

 Aidha, elimu imekuwa ikitolewa kupitia vyombo vya habari zikiwemo redio jamii, redio za kitaifa, runinga, magazeti, mitandao ya kijamii, matangazo, majarida na vipeperushi.Ndugu Wanahabari,Tatu ni Kuongeza Ufanisi wa Maabara; TBS ina jumla ya maabara 14 na zote zimeweza kupata ithibati za umahiri, ambapo maabara hizo zimehakikiwa na kupatiwa vyeti vya ithibati ya umahiri wa kimataifa. 

Hatua hiyo inamaanisha kuwa majibu ya sampuli kutoka katika maabara hizo yanaaminika na kukubalika popote duniani na hivyo kurahisisha biashara ndani na nje ya mipaka ya nchi yetu. Katika kipindi hicho TBS imeweza kupima sampuli zaidi ya 188,952 na kufanyia ugezi vifaa 54,396 ambapo suala hili litasaidia kuhakikisha katika soko kunakuwa na bidhaa zenye ubora.Pia, maabara hizo zina mashine za kisasa (state-of -art-equipment) zinazopelekea kupata majibu kwa wakati na sahihi, Serikali imeweza kutumia kiasi kisichopungua TZS 12.9 bilioni kuhakikisha mashine hizi zinapatikana. 

 Pamoja na mashine nyingi zilizopo katika maabara hizo, kuna mashine za kipekee kama ifuatavyo;Mashine ya hydrostatic pressure test ya kupima mabomba ya maji na yenye uwezo wa kupima mabomba yenye kipenyo cha milimita 12 sawa na inch 0.5 hadi milimita 800 sawa na inchi 32. Mashine hii ina uwezo pia wa kupima sampuli 120 kwa wakati mmoja na kati ya nchi 54 za Barani Afrika inapatikana katika nchi tano tu ikiwemo Tanzania;Mashine ya automatic conductor resistance tester ya kupimia waya (cables) za umeme za aina zote zenye kipenyo hadi kufikia milimita 40 sawa na milimita za mraba 1200. Mashine hii ni ya kipekee kwa kuwa ni ya kidigitali na ina uwezo wa kupima na kutoa majibu kwa haraka; Mashine ya solar simulator ambayo katika ukanda wa Afrika Mashariki na Kati inapatikana Tanzania pekee katika ofisi zetu za TBS. Mashine hii inauwezo wa kupima solar panels za aina zote bila kutegemea uwepo wa jua. 

Ndugu Wanahabari,Jambo la nne ni, Kuimarisha Mifumo ya TEHAMA- ICTM Shirika linatumia mifumo ya TEHAMA katika utoaji wa huduma zake mbalimbali kama vile leseni ya ubora, ukaguzi wa shehena zinazotoka nje ya nchi na usajili wa bidhaa za chakula na vipodozi, majengo, maeneo ya uzalishaji, uuzaji, vyombo vya usambazaji wa bidhaa za chakula na vipodozi. Mifumo hiyo ni OAS na i-SQMT. 

Aidha, Shirika limeboresha huduma zake kwa wafanyabiashara wanaoingiza bidhaa nchini kwa kuunganisha mfumo wake unaoitwa Online Application System na mfumo wa Dirisha Moja la Huduma (Tanzania electronic Single Window System – TeSWS) ambapo mfanyabiashara anatuma maombi na anapata huduma za taasisi zote kupitia mfumo huo.

Ndugu Wanahabari,Tano tumeweza, kuanza utekelezaji wa Mkakati wa Taifa wa Matumizi ya Nishati Safi ya KupikiaSerikali katika kuboresha upatikanaji wa nishati safi, kupunguza athari za mabadiliko ya tabianchi, na kutunza mazingira huku ikiokoa maisha kupitia suluhisho endelevu la upatikanaji wa nishati safi ya kupikia kupitia TBS na washirika wa maendeleo na Wizara ya Nishati imeanza kuandaa viwango vya ufanisi wa nishati kwa vifaa vya umeme vya majumbani.

Vilevile vifaa vya Maabara vya kisasa vinaendelea kununuliwa kwa ajili ya kuhakikisha vifaa vinavyoingia sokoni vinakidhi viwango vilivyowekwa kabla ya kuwafikia watumiaji. Hatua hii inalenga kupunguza uzalishaji wa gesi ya ukaa na hivyo kulinda mazingira, na pia kupunguza upotevu wa nishati, na hivyo kupunguza gharama kwa watumiaji.

Read More

Mamlaka ya Hifadhi ya Ngorongoro imewataka watumishi wake waliohudhuria mafunzo ya kiutumishi kwa siku tano mjini Dodoma kuyafanyia kazi.

Na. Jerome Mlaki wa Dar.. 0789106710

Mamlaka ya Hifadhi ya Ngorongoro imewataka watumishi wake waliohudhuria mafunzo ya kiutumishi kwa siku tano mjini Dodoma kuyafanyia kazi mafunzo yao ili waweze kuongeza ufanisi katika utendaji.

Naibu Kamishna wa Mamlaka hiyo anayeshughulikia huduma za shirika Aidan Makalla ametoa rai hiyo kwa watumishi has wakati akifunga mafunzo ya wiki moja yenye lengo la kuwajengea watumishi uelewa kuhusu utawala bora, usimamizi wa rasilimali watu, matumizi ya teknolojia ya kisasa katika uhifadhi, Utoaji wa huduma bora kwa wateja na nidhamu mahala pa kazi

Makalla amesema mamlaka imewekeza mtaji kwa watumishi hao kwa kuwapa elimu hiyo ya utumishi, maadili, uwekezaji,afya ya akili na itifaki ikiamini kwamba mafunzo ndiyo nyenzo muhimu katika uwajibikaji.

“Sisi viongozi wa mamlaka ni kama wazazi tuna wajibu wa kuwapa mafunzo ili msiharibikiwe na baadaye mamlaka ikaja kulaumiwa, yatumieni mafunzo haya kuyajenga katika kazi zenu,”alisema Makalla.

Hii ni awamu ya Pili kwa mwaka huu wa fedha kwa Mamlaka ya Hifadhi ya Ngorongoro kutoa mafunzo kwa watumishi wake ikiamini kwamba asiyefunzwa na mamaye atafunzwa na ulimwengu.

Read More

UTABIRI WA HALI YA HEWA KWA SAA 24 ZIJAZO

 Na Jerome Mlaki wa Dar. 0789106710

Read More

Usajili wa vituo vya Kulea watoto mchana na Watoto Wachanga

Na Jerome Mlaki wa Dar. 0789106710

Usajili wa vituo vya Kulea watoto mchana na Watoto Wachanga 

UTARATIBU WA USAJILI WA VITUO VYA KULELEA WATOTO WADOGO MCHANA NA WATOTO WADOGO

1.0 Utangulizi

  Vituo vya kulelea watoto wadogo mchana, ni moja ya huduma za malezi makuzi na maendeleo ya awali ya mtoto zinazotolewa katika taasisi zinazoratibiwa na kusimamiwa na Wizara chini ya Idara ya Ustawi wa Jamii.

Huduma hizi zilianza kutolewa mwaka 1967 wakati wa Vijiji vya Ujamaa kwa lengo la kuwapatia wazazi nafasi ya kushiriki kwenye shughuli za uzalishaji mali. Mwaka 1981 ilitungwa Sheria ya vituo vya kulelea watoto wadogo mchana na mwaka 1982 zilitungwa kanuni kwa ajili ya utekelezaji wa sheria hiyo ambapo taasisi za serikali ,mashamba makubwa, pamoja na watu binafsi waliazisha huduma hizo ikiwemo; Magereza ,Shirika la reli,mashamba ya mikonge na chai,viwanda vya sukari n.k.

Mwaka 1985 kilianzishwa chuo cha ustawi wa Jamii Kisangara-Mwanga kwa ajili ya kuzalisha walezi wa vituo vya kulelea watoto wadogo mchana na baadae kupanua wigo kwa watu binafsi na mashirika ya dini kuanzisha vyuo vya malezi kwa ajili ya kukidhi mahitaji ya walezi nchini . Mwaka 2009 ilitungwa Sheria ya Mtoto ambapo Sheria hii iliunganisha Sheria zote zinazohusu watoto ikiwemo sheria ya vituo vya kulelea watoto wadogo mchana.

Huduma hii imegawanyika katika maeneo makuu matatu:

Vituo vya kulelea watoto wachanga vinavyotoa huduma kwa watoto walio na umri kuanzia miezi 3 hadi miaka 2 (Crèches),

Vituo vya kulelea watoto wadogo mchana vinavyotoa huduma kwa watoto walio na umri wa miaka 2 hadi miaka minne (Day Care Centers)

Vituo vya kulelea watoto wadogo mchana vinavyomilikiwa na jamii kwa watoto wa umri wa miaka 2 hadi minne (Community Based Day Care Centers).

2.0 Madhumuni ya kuanzisha vituo hivi

Vituo hivi vimeanzishwa kwa madhumuni yafuatayo:

Kuwapa nafasi zaidi wazazi wa watoto ili waweze kufanya kazi zao za uzalishaji mali bila kuwa na hofu juu ya usalama wa watoto wao wakati wa mchana.

Kuwapatia watoto mazingira bora yanayowawezesha kukuza akili, mwili, lugha, hisia zao pamoja na kuwakuza kijamii na kiutamaduni.

Kuwapatia watoto malezi bora,

Kuwapa mwongozo na mwenendo bora wa maisha, utii, heshima na ushirikiano.

e)Kubaini na kuendeleza vipaji vya watoto na kuwaandaa kwa ajili ya kujiunga na shule za awali na hatimaye shule za msingi

f)Kufanya utambuzi wa mapema wa watoto wenye mahitaji maalumu/ ukuaji usio wa kawaida kwa ajili ya kuwapatia afua stahiki.

g) Kukuza ujifunzaji wa mapema na uhamasishaji wa kila mtoto na kukuza ujuzi wa kukabiliana na changamoto

Read More

Mamlaka ya Hali ya Hewa Tanzania (TMA)

 

DAR ES SALAAM: 

Na Jerome Mlaki wa Dar. 0789106710

Mamlaka ya Hali ya Hewa Tanzania (TMA) imetabiri mvua za msimu wa Vuli wa Oktoba hadi Desemba 2026 kuwa za wastani hadi juu ya wastani katika maeneo mbalimbali nchini, huku ikiwataka wananchi na wadau kuchukua tahadhari mapema kutokana na uwezekano wa vipindi vya mvua kubwa na mafuriko.

Kwa mujibu wa TMA, mvua hizo zinatarajiwa kuanza katika wiki ya kwanza na ya pili ya Oktoba katika maeneo ya Arusha na Manyara, pamoja na ukanda wa Kaskazini unaojumuisha Tanga, Dar es Salaam, kaskazini mwa Morogoro, Mafia na Pemba.

“Wananchi wanapaswa kufuatilia taarifa rasmi za hali ya hewa na kuchukua hatua mapema ili kupunguza madhara yanayoweza kusababishwa na mvua kubwa,” TMA imesema.

MAFURIKO NA KILIMO

TMA imeonya kuwa mvua nyingi zinaweza kuongeza unyevunyevu wa udongo na kusababisha mafuriko, hali inayoweza kuathiri shughuli za kilimo na uzalishaji wa chakula.

Pamoja na changamoto hizo, mvua zinaweza kuongeza uzalishaji katika maeneo yatakayotumia vizuri fursa hiyo. Wakulima wametakiwa kuandaa mashamba, kupanda kwa wakati, kutumia pembejeo sahihi na kuboresha usimamizi wa maji.

“Wakulima wanashauriwa kutumia mbinu bora za kilimo, kuvuna maji ya mvua na kuchukua hatua za kudhibiti visumbufu vya mimea ili kupunguza athari na kuongeza uzalishaji,” imesema TMA.

BARABARA, MADARAJA NA USAFIRI

Mamlaka hiyo imeonya kuwa mvua kubwa zinaweza kusababisha mafuriko, mmomonyoko wa udongo, kuharibika kwa barabara na madaraja, hali inayoweza kuvuruga usafiri na kuongeza hatari ya ajali.

Bandari nazo zinaweza kukumbwa na mawimbi makubwa na hali mbaya ya bahari, huku usafiri wa anga ukiathiriwa na mwonekano hafifu na kuchelewa kwa safari.

TMA imewataka wadau wa usafiri kukagua miundombinu mara kwa mara na kufuatilia taarifa za hali ya hewa ili kuchukua hatua kwa wakati.

AFYA NA MAZINGIRA

TMA pia imeonya kuhusu uwezekano wa kuongezeka kwa magonjwa kutokana na maji kutuama, kuathirika kwa mifumo ya maji taka na uchafuzi wa vyanzo vya maji.

Mamlaka za afya zimetakiwa kujiandaa kwa changamoto hizo, huku wananchi wakihimizwa kuchukua hatua za usafi na kuzuia maji kutuama katika maeneo ya makazi.

WAFUGAJI NA WAVUVI

Wafugaji wametakiwa kupanga matumizi ya maji na malisho pamoja na kufuatilia ushauri wa wataalamu wa mifugo.

Wavuvi na wakulima wa mwani nao wametakiwa kufuatilia taarifa za hali ya hewa na bahari kabla ya kuanza shughuli zao ili kupunguza hatari zinazoweza kujitokeza.

SERIKALI ZA MITAA ZATAKIWA KUJIANDAA

TMA imezitaka serikali za mitaa kuimarisha mifumo ya mifereji, kuondoa vizuizi kwenye njia za maji na kutoa elimu kwa wananchi kuhusu namna ya kujikinga na mafuriko.

“Maandalizi ya mapema ni muhimu katika kupunguza madhara ya matukio ya hali mbaya ya hewa,” TMA imesisitiza.

TMA imesema pia imeendelea kuboresha utabiri wa hali ya hewa hadi ngazi ya wilaya, hatua inayolenga kuwasaidia wananchi, wakulima, wafugaji, wafanyabiashara na serikali kupanga shughuli zao kwa kuzingatia mwenendo wa hali ya hewa.

Mamlaka hiyo imewataka wananchi kuendelea kufuatilia taarifa za kila siku, angalizo na tahadhari rasmi zitakazotolewa kadiri hali ya hewa itakavyobadilika.

“Taarifa rasmi za hali ya hewa zinapaswa kuwa chanzo cha msingi katika kuhabarisha na kuelimisha jamii kuhusu matukio yanayoweza kujitokeza,” TMA imesema

Read More

Mamlaka ya Hali ya Hewa Tanzania (TMA) imetoa rasmi utabiri wa mvua.

 Na Jerome Mlaki waDar

Mamlaka ya Hali ya Hewa Tanzania (TMA) imetoa rasmi utabiri wa mvua za msimu wa Novemba 2026 hadi Aprili 2027 kwa mikoa 14 nchini, ikiwemo Kigoma, Katavi, Tabora, Rukwa, Mbeya na Ruvuma.

Kwa mujibu wa taarifa hiyo, mikoa mingine iliyojumuishwa katika utabiri huo ni Songea, Iringa, Njombe, Morogoro Kusini, Singida, Dodoma, Lindi na Mtwara.

Utabiri huo umetolewa na Mkurugenzi Mkuu wa TMA, Dkt. Ladislaus Benedict Chang'a, ukiwa sehemu ya juhudi za kuziwezesha sekta mbalimbali na wananchi kwa ujumla kujiandaa na kupanga shughuli zao kulingana na matarajio ya hali ya hewa katika kipindi hicho.

TMA imeeleza kuwa utabiri huo wa mvua za msimu unahusu maeneo yaliyotajwa kwa kipindi cha miezi sita, kuanzia Novemba 2026 hadi Aprili 2027.

Wakati huo huo, utabiri wa mvua za Vuli kwa kipindi cha Oktoba hadi Desemba 2026 ulitolewa rasmi mwezi Agosti mwaka huu, ukihusisha mikoa ya Kagera, Geita, Mwanza, Shinyanga, Simiyu, Mara na Kaskazini mwa Kigoma.

Mikoa mingine iliyoainishwa katika utabiri wa Vuli ni Arusha, Kilimanjaro, Manyara, Tanga, Dar es Salaam, Pwani, Kaskazini mwa Morogoro pamoja na visiwa vya Unguja na Pemba.

Utoaji wa utabiri wa mvua za misimu ni muhimu kwa maandalizi ya shughuli za kilimo, mifugo, usafiri na sekta nyingine zinazotegemea hali ya hewa.

Read More

Serikali imeeleza umuhimu wa kuimarisha sera na mazingira ya biashara kwa kampuni changa za ubunifu (startups),

 Serikali imeeleza umuhimu wa kuimarisha sera na mazingira ya biashara kwa kampuni changa za ubunifu (startups), huku wadau wakitaja upatikanaji wa mitaji, masoko na changamoto za kanuni za uendeshaji kuwa miongoni mwa vikwazo vinavyohitaji ufumbuzi.

Hoja hizo zimeibuliwa katika Tanzania Startup Week 2026, inayofanyika Dar es Salaam, ambapo viongozi wa Serikali na wadau wa sekta ya ubunifu wamejadili namna ya kukuza kampuni changa na kuwezesha mawazo ya vijana kugeuka biashara zenye uwezo wa kukua.

Akizungumza katika mkutano huo, Makamu wa Rais wa Jamhuri ya Muungano wa Tanzania, Deogratius Ndejembi, amezungumzia umuhimu wa uundwaji wa sera zitakazosaidia kuimarisha mfumo wa startups nchini na kuweka mazingira yatakayowezesha sekta hiyo kuchangia maendeleo ya uchumi.

Kwa upande wake, Waziri wa Viwanda na Biashara, Judith Kapinga, amesisitiza umuhimu wa kuboresha mazingira ya biashara, kurahisisha mifumo ya kiutendaji na kuimarisha ushirikiano kati ya Serikali na sekta binafsi ili kusaidia biashara kukua.

Kapinga amesema taasisi na wizara zinapaswa kutathmini mifumo yao, taratibu na sheria ili kubaini maeneo yanayohitaji maboresho. Lengo ni kuwezesha wafanyabiashara kupata maelekezo yanayoeleweka kuhusu huduma wanazohitaji bila kukwama kutokana na mifumo isiyoratibiwa vizuri.

Ameeleza pia kuwa Serikali iko tayari kushirikiana na wadau wa sekta binafsi katika kuendeleza biashara na kupanua masoko, huku vijana wakihimizwa kutafuta fursa za uwezeshaji zinazoweza kusaidia kukuza miradi yao.

Naye Mtendaji Mkuu wa Tanzania Startup Association, Zahoro Muhaji, ameeleza kuwa kampuni changa zinakabiliwa na changamoto zinazohusiana na upatikanaji wa fedha, masoko na kanuni za biashara, akisisitiza umuhimu wa majadiliano hayo kuzaa hatua za utekelezaji.

Muhaji amesema mkutano umejikita katika maeneo matatu ya msingi, ambayo ni sera na kanuni, upatikanaji wa mitaji na fedha, pamoja na upatikanaji wa masoko. Ameeleza kuwa majadiliano na Serikali yamefungua nafasi ya kutafuta ufumbuzi wa changamoto zinazowakabili wajasiriamali.

Kwa upande wa Mwenyekiti wa Bodi ya Tanzania Startup Association, Paul Makanza, amesisitiza umuhimu wa kuwaunganisha wajasiriamali na wawekezaji ili mawazo ya kibunifu yapate mitaji na nafasi ya kukua kibiashara.

Makanza amependekeza kuanzishwa kwa maeneo maalumu ya ubunifu yatakayowawezesha wajasiriamali kukutana, kufanya kazi na kuwasilisha mawazo yao kwa wawekezaji. Maeneo hayo yanaweza kushirikisha taasisi za kifedha na kampuni za mawasiliano ili kurahisisha upatikanaji wa huduma muhimu, ikiwamo intaneti.

Amesema soko la huduma za kidijitali barani Afrika lina fursa kubwa kutokana na matumizi ya simu na uwezekano wa teknolojia kutumika katika sekta mbalimbali, zikiwamo biashara, usafiri na nishati.

Wadau hao wameeleza kuwa ushirikiano kati ya Serikali, taasisi za kifedha, kampuni za mawasiliano na startups ni muhimu katika kuboresha mazingira ya biashara, kuvutia mitaji na kuhakikisha mawazo ya vijana yanageuka kuwa shughuli za kiuchumi zinazoweza kukua na kutoa fursa kwa wengine.

Read More

Shirika la Madini la Taifa (STAMICO) laongeza mapato yake

Mkurugenzi Mtendaji wa STAMICO, Dkt. CPA Venance Mwasse

Na Jerome Mlaki wa Dar. 0789106710

Shirika la Madini la Taifa (STAMICO) limeongeza mapato yake kutoka Sh bilioni 1.3 hadi takribani Sh bilioni 147.8 katika mwaka wa fedha 2025/26, mafanikio yanayohusishwa na mageuzi ya kiutendaji, uwekezaji katika miradi ya madini na kuimarisha usimamizi.

Hayo yamebainishwa leo Oktoba 16,2026 na Mkurugenzi Mtendaji wa STAMICO, Dkt. CPA Venance Mwasse wakati akizungumza na Wahariri na Waandishi wa habari nakusema kuwa mageuzi ya kuimarisha shirika hilo yaliyoanza mwaka 2020 yameimarisha uwezo wa shirika kujiendesha na kupunguza utegemezi wa fedha za Serikali.

Dkt.Mwasse ametaja mafanikio mengine kuwa ni kuongezeka kwa watumishi kutoka 111 hadi karibu 800, kuingia mikataba minne ya ubia katika miradi ya madini ya kimkakati na kuendelea kuboresha mradi wa makaa ya mawe wa Kiwira, mkoani Songwe.

Akizungumzia kuhusu wachimbaji wadogo, amesema shirika limeongeza mitambo ya uchorongaji kutoka mitatu hadi 18 na kuweka mitambo 17 kwa ajili ya kuwasaidia wachimbaji, sambamba na kutoa mafunzo na ushauri wa kitaalamu."STAMICO ina masoko 44 na vituo vidogo vya ununuzi wa madini takribani 120, vinavyorahisisha uuzaji rasmi wa madini na kusaidia kupunguza utoroshaji."amesema

Halikadhalika ameongeza kuwa mchakato wa kuanzisha Benki ya Wachimbaji Tanzania umeanza kwa kushirikiana na wadau, kwa lengo la kuongeza upatikanaji wa mitaji kwa wachimbaji wadogo.

Dkt. Mwasse amesisitiza kuwa STAMICO ni mwekezaji katika sekta ya madini, si mdhibiti, jukumu linalotekelezwa na taasisi husika za Serikali.

Kwa upande Mwenyekiti wa Jukwaa la Wahariri Tanzania (TEF), Deodatus Balile, amesema mafanikio ya STAMICO yanaonyesha umuhimu wa mageuzi katika taasisi za umma, huku akisisitiza haja ya kuimarisha utafiti na ukusanyaji wa takwimu za kisasa ili kupima matokeo ya shughuli zake kwa usahihi.

Kumbuka kuwa STAMICO, ilianzishwa  mwaka 1972 na inamilikiwa na Serikali kwa asilimia 100,inashiriki katika mnyororo wa thamani wa madini kuanzia utafiti na uchimbaji hadi uchenjuaji, uongezaji thamani na biashara ya 

Read More

Soko la Hisa la Dar es Salaam (DSE) limehimiza Halmashauri nchini kutumia fursa

 

Na Jerome Mlaki wa Dar.

Soko la Hisa la Dar es Salaam (DSE) limehimiza Halmashauri nchini kutumia fursa zinazopatikana katika masoko ya mitaji kutafuta fedha kwa ajili ya utekelezaji wa miradi ya maendeleo na kuboresha utoaji wa huduma kwa wananchi.

Wito huo umetolewa katika warsha ya mafunzo kuhusu ufadhili mbadala kwa Halmashauri kupitia fursa za masoko ya mitaji, inayofanyika Oktoba 15 na 16, 2026.

Katika warsha hiyo, Mkurugenzi wa Usimamizi na Uchunguzi wa Soko wa Mamlaka ya Masoko ya Mitaji na Dhamana (CMSA), Bw. Exaut Julius, amesema masoko ya mitaji yanaweza kuwa chanzo cha ziada cha fedha kwa Halmashauri zinazolenga kutekeleza miradi mikubwa ya maendeleo, hususan katika sekta za maji, afya, usafi wa mazingira, masoko, vituo vya mabasi, majengo ya biashara na miundombinu mingine ya kiuchumi.

Amesema kuongezeka kwa mahitaji ya huduma za kijamii na miundombinu kunahitaji Halmashauri kubuni njia mbadala na endelevu za kugharamia miradi ya maendeleo badala ya kutegemea chanzo kimoja cha fedha.

Kwa mujibu wa Bw. Julius, ingawa ruzuku za Serikali na mapato ya ndani vinaendelea kuwa vyanzo muhimu vya fedha kwa Halmashauri, masoko ya mitaji yanaweza kutoa fursa ya kuongeza rasilimali fedha kwa ajili ya miradi inayokidhi vigezo vinavyohitajika.

Ameeleza kuwa baadhi ya nyenzo zinazoweza kuchunguzwa ni pamoja na hati fungani za miundombinu, hati fungani za kijani na mifumo mingine ya ufadhili inayoruhusiwa kisheria, kulingana na aina ya mradi na uwezo wake wa kifedha.

Hata hivyo, amesisitiza kuwa si kila mradi unafaa kufadhiliwa kupitia masoko ya mitaji, akibainisha umuhimu wa kufanya tathmini ya kina ya gharama, mapato yanayotarajiwa, vihatarishi na uwezo wa kutimiza wajibu wa kifedha kwa wawekezaji.

Akizungumzia usimamizi wa ufadhili kupitia masoko ya mitaji, Bw. Julius amesema upatikanaji wa fedha unapaswa kuambatana na uwazi, utawala bora, uwajibikaji na ulinzi wa wawekezaji.

Amesema taasisi zinazotaka kutumia fursa hizo zinapaswa kuwa na mifumo madhubuti ya utoaji wa taarifa za kifedha, usimamizi wa vihatarishi na uzingatiaji wa sheria na kanuni zinazosimamia masoko ya mitaji.

Ameongeza kuwa maandalizi bora ya miradi ni muhimu katika kujenga imani ya wawekezaji na kuhakikisha fedha zitakazopatikana zinatumika kwa malengo yaliyokusudiwa.

Bw. Julius amesema ushirikiano kati ya Ofisi ya Rais – TAMISEMI, CMSA, DSE na Halmashauri ni muhimu katika kuhakikisha miradi ya maendeleo inaandaliwa kwa viwango vinavyokidhi mahitaji ya ufadhili kupitia masoko ya mitaji.

Ameeleza kuwa TAMISEMI ina nafasi muhimu katika kuratibu mipango ya maendeleo ya Serikali za Mitaa, huku CMSA na DSE zikichangia katika maeneo yao ya kitaalamu ili kuwezesha Halmashauri kuelewa na kutumia fursa za masoko ya mitaji.

Aidha, amesema mifumo kama Special Purpose Vehicles (SPVs) inaweza kuchunguzwa kama mojawapo ya njia za kimuundo za kutekeleza miradi, kwa kuzingatia mahitaji ya mradi na masharti ya kisheria.

Katika warsha hiyo, washiriki wanatarajiwa kujengewa uwezo wa kutambua miradi inayoweza kufadhiliwa kupitia masoko ya mitaji, kuchagua nyenzo zinazofaa za ufadhili na kuelewa maandalizi yanayohitajika kabla ya kuwasilisha miradi kwa wawekezaji.

Masuala mengine yatakayojadiliwa ni pamoja na vyanzo vya mapato kwa ajili ya kutimiza wajibu wa kifedha, majukumu ya Halmashauri katika usimamizi wa miradi na taratibu zinazopaswa kufuatwa ili kukamilisha mchakato wa kupata ufadhili.

Washiriki wamehimizwa kutumia fursa hiyo kuuliza maswali, kubadilishana uzoefu na kujadili changamoto zinazoweza kujitokeza katika utekelezaji wa mifumo ya ufadhili mbadala.

Matarajio ni kwamba mafunzo hayo yatasaidia Halmashauri kubaini miradi ya kipaumbele inayoweza kuandaliwa kwa ajili ya kutafuta ufadhili kupitia masoko ya mitaji.

Warsha hiyo ya siku mbili inalenga kuimarisha uelewa wa Halmashauri kuhusu fursa za masoko ya mitaji na namna zinavyoweza kuchangia katika kupanua wigo wa upatikanaji wa fedha kwa ajili ya miradi ya maendeleo nchini

Read More