HOTUBA YA MHE. THOMAS MIHAYO, JAJI MSTAAFU, AKIFUNGUA WARSHA YA KUKUSANYA MAONI YA WADAU KWA AJILI YA KUPITIA UPYA SERA YA TAIFA YA UTALII YA MWAKA 1999, DAR ES SALAAM

TAREHE 13 SEPTEMBA, 2017

Ndugu,

Katibu Tawala Mkoa wa Dar Es salaam

Kaimu Mkurugenzi wa Utalii,

Mtaalamu Mwelekezi,

Wawakilishi wa Asasi mbalimbali za Sekta ya Utalii Kanda ya Pwani,

Wageni waalikwa,

Mabibi na Mabwana,

Ninayo furaha kubwa kujumuika pamoja nanyi leo katika warsha hii muhimu ya

kuendeleza mchakato wa kupitia upya Sera ya Taifa ya Utalii ya mwaka 1999.

Napenda kuchukua fursa hii kuwapongeza wote mtakaoshiriki warsha hii

iliyoandaliwa mahsusi kwa ajili ya kukusanya maoni yatakayojumuishwa katika

Sera mpya ya Taifa ya Utalii. Ni matumaini yangu kuwa mtashiriki kikamilifu

kutoa maoni yenu ili tuweze kuwa na dira nzuri ya sekta hii yenye mchango

mkubwa katika ukuaji wa uchumi wa taifa letu. Ninatambua kuwa, warsha hii

imeshirikisha wadau wa utalii kutoka mikoa miwili ya Kanda ya Pwani ambayo ni;

Dar es Salaam na Pwani.

Ndugu Washiriki,

Nichukue fursa hii kipekee, kuwashukuru wadau wetu wakubwa wa maendeleo

Benki ya Dunia (WB) chini ya uratibu wa Ofisi ya Waziri Mkuu, kwa kutoa

ushirikiano wa kuwezesha warsha hii katika kanda mbalimbali ikiwemo kanda ya

Pwani ambayo inafanyika leo hapa Mkoani Dar es Salaam. Aidha, nawashukuru

pia wadau wa Sekta Binafsi Shirikisho la Vyama vya Utalii Tanzania (TCT) kwa

kuwezesha warsha kama hii kufanyika. Ushirikiano wa namna hii ndio

2

utawezesha kuendeleza sekta ya Utalii na Ukarimu kwa kiwango cha juu na

hivyo kukuza uchumi wa taifa letu.

Ndugu Washiriki,

Ikumbukwe kuwa, Sera ya Taifa ya Utalii iliyopo ilifanyiwa mapitio kwa mara ya

mwisho mwaka 1999 ambapo ni takribani miaka 17 iliyopita. Katika kutambua

hilo, Wizara imeanza kupitia upya Sera hii ili kuhakikisha Sekta ya Utalii inakidhi

changamoto zinazotokana na mabadiliko mbalimbali yanayotokea duniani

yakiwamo ya teknolojia, kijamii, kiuchumi, kisiasa na mazingira.

Aidha, misingi ya kuandaa Sera yeyote ni pamoja na kushirikisha wadau wote

muhimu ambao ndio watekelezaji wa Sera hiyo. Tukizingatia ya kuwa Sekta ya

Utalii inaendeshwa kwa kiasi kikubwa na Sekta Binafsi katika kutoa huduma na

kufanya biashara za utalii hapa nchini, tunategemea kupata maoni na michango

yenye tija itakayowezesha upatikanaji wa Sera bora itakayoleta ufanisi katika

uendeshaji wa huduma zinazotolewa katika sekta hii. Kwa kutambua mchango

wa utalii kwa maendeleo endelevu ya taifa letu, ni wazi kuwa tunahitaji Sera

wezeshi yenye kutoa mwongozo wa utaratibu bora na sahihi wa usimamizi,

uendelezaji na utendaji katika sekta ya utalii nchini.

Ndugu washiriki,

Wote tunaelewa ya kuwa sekta ya Utalii ni moja wapo ya sekta zinazokua kwa

kasi na hivyo kuchangia kwa kiasi kikubwa ukuaji wa uchumi wa nchi. Takwimu

zilizopo zinaonyesha kuwa, sekta ya utalii inachangia 17.5% ya Pato la Taifa

(GDP) na huliingizia Taifa fedha za kigeni (asilimia 25).

Ukuaji wa sekta hii, umedhihirika pale ambapo katika miaka ya hivi karibuni

mapato yatokanayo na utalii yaliongezeka kutoka Dola za Kimarekani bilioni 1.7

mwaka 2012 hadi kufikia Dola za Kimarekani bilioni 2.1 mwaka 2016. Ongezeko

la mapato hayo ni kutokana na kuongezeka kwa idadi ya watalii kutoka

1,077,058 mwaka 2012 hadi kufikia watalii 1,284,279 mwaka 2016.

3

Ukuaji huu wa sekta ya utalii umechangiwa kwa kiasi kikubwa na juhudi za

Serikali katika usimamizi, uhifadhi na matumizi endelevu ya rasilimali, utangazaji

katika masoko mbalimbali duniani utalii, mazingira bora ya uwekezaji pamoja na

ushirikiano madhubuti baina ya sekta za umma na binafsi kwa kuzingatia kanuni

na taratibu zilizopo. Hata hivyo ukuaji huu hauwiani na rasilimali nyingi tulizonazo

ambazo ni nzuri, na za kuvutia ukilinganisha na nchi jirani ambao ni washindani.

Tunapaswa sasa tukae pamoja tujadili na kutoa michango yetu ya dhati

itakayotuwezesha kupata dira ya kutuongoza katika kuinua mchango wa sekta hii

na hivyo kukuza uchumi wa nchi yetu.

Ndugu washiriki,

Tuna kazi kubwa iliyoko mbele yetu, ni vyema sasa kuweka mawazo yetu kwa

pamoja katika kipindi cha masaa machache yajayo na kuibuka na maoni mazuri

yatakayojumuishwa kwenye Sera mpya ya Taifa ya Utalii.

Baada ya kusema haya machache, ninayo furaha kutamka kuwa Warsha hii ya

kukusanya maoni ya wadau wa kanda ya Pwani kwa ajili ya kupitia upya Sera ya

Taifa ya Utalii ya mwaka 1999, imefunguliwa rasmi.

AHSANTENI SANA KWA KUNISIKILIZA NA NAWATAKIA MAJADILIANO

MEMA